Raja Shambhuchhatrapti - राजा शंभूछत्रपती By Vijayrao Deshmukh

Raja Shambhuchhatrapti - राजा शंभूछत्रपती Author - Vijayrao Deshmukh

Important - ( This Product - Pickup Option not Available )

शिवदुर्गदर्शन यात्रेमध्ये सातारच्या राजमाता सुमित्राराजे भोसले यांनी शंभूराजेंचे खरे दर्शन घडविणारे चरित्र सर्वसामान्य लोकांना समजू शकेल, अशा भाषेत लिहावे, अशी सूचना केली. त्यांची ही आज्ञा शिरसावंद्य मानून सहा महिन्यांत केवळ शंभूचरित्राचा ध्यास घेत विजयराव देशमुख यांनी लिहिलेले शंभूराजेंचं चरित्र म्हणजेच राजा शंभू छत्रपती. या ग्रंथाला अभूतपूर्व प्रतिसाद लाभला. जेमतेम ६ महिन्यांत तब्बल ११ हजार प्रती संपल्या. छत्रपती संभाजी महाराजांची खरी प्रतिमा समाजापुढे आणली आणि त्यांच्याविषयी आदर, भक्ती, श्रद्धा जनमानसात दृढ झाली. छत्रपती संभाजी महाराजांच्या पराक्रमाचे, त्यांच्या कर्तृत्वाचे सच्चे दर्शन घडविणारा हा ग्रंथ प्रत्येकाच्या संग्रही असायलाच हवा.

१९८७ सालच्या नोव्हेंबरमधील गोष्ट. अहमदनगरला सूर्यपुत्र कर्णावरील त्रिदिवसीय व्याख्यानमालेसाठी गेलो होतो. फावल्या वेळात अहमदनगर परिसरातील ऐतिहासिक वास्तू, कागदपत्रे दुर्मिळ वस्तूंचा संग्रह पाहत होतो. आमचे स्नेही प्रसिद्ध इतिहाससंशोधक व अहमदनगर ऐतिहासिक वस्तुसंग्रहालयाचा आधारस्तंभ असलेले श्री. सुरेशराव जोशी यांच्या सत्संगात वेळ मजेत जात होता.

व्याख्यानमालेच्या शेवटच्या दिवशी सकाळी सुरेशराव अचानक मला म्हणाले, ‘विजयराव मी तुम्हाला एक अद्भुत गोष्ट दाखवणार आहे.’ माझी उत्सुकता शिगेला पोचली. सुरेशरावांसोबत मी ऐतिहासिक वस्तुसंग्रहालयात गेलो. सुरेशरावांनी मला एका खुर्चीवर बसवले. टेबलावर एक दुर्बीण ठेवली आणि म्हणाले, ‘विजयराव, अवघे प्राण डोळ्यात आणून हे चित्र पाहा.’ आणि हळूच जुन्या दौलताबादी कागदावर रेखाटलेले १७ व्या शतकातील काळ्या रंगात चितारलेले एक अस्सल ऐतिहासिक चित्र दुर्बिणीखाली सुरेशरावांनी सरकवले.